İtaliyada mart ayında Parma yaxınlığındakı Magnani-Rocca Fondunun muzeyindən oğurlanan, ümumi dəyəri 9 milyon avrodan çox olan üç qiymətli sənət əsəri tapılıb.

"Reuters" xəbər verir ki, Karabinyerlərin keçirdiyi əməliyyat nəticəsində Pol Sezanın “Albalı ilə natürmort”, Pyer-Ogüst Renuarın “Balıqlar” və Anri Matissin “Terrasdakı odalisk” əsərləri Parma şəhərindəki yaşayış binasında aşkarlanıb.

Oğurluq martın 22-dən 23-nə keçən gecə baş verib. Maskalı şəxslər muzeyə daxil olaraq üç əsəri divardan götürüb. Təhlükəsizlik kameralarına görə, cinayət üç dəqiqədən az müddətdə həyata keçirilib.

Beş aylıq istintaq nəticəsində əsərlərin izi müəyyənləşdirilib. Cinayət işi üzrə doqquz Moldova vətəndaşı istintaqa cəlb olunub. Oğurlanan əsərlərin qanunsuz sənət bazarında satılmasına cəhd edildiyi bildirilir.

Renuarın “Balıqlar” əsərinin təxminən 6 milyon, Sezanın “Albalı ilə natürmort” əsərinin isə 3 milyon avro dəyərində olduğu qeyd edilir.

Magnani-Rocca Fondunun kolleksiyasında Renuar, Sezan və Matisse ilə yanaşı, Tisian, Dürer, Rubens, Qoya və Mone kimi məşhur rəssamların əsərləri də saxlanılır.