Bu ilin birinci yarısında Ədliyyə Nazirliyinin rayon (şəhər) qeydiyyat şöbələri tərəfindən ölkə ərazisində 19 min 224 nikaha daxilolma və 9 min 776 boşanma halı qeydə alınıb.
Dövlət Statistika Komitəsi bildirir ki, 2025-ci ilin müvafiq dövrü ilə müqayisədə əhalinin hər 1000 nəfərinə nikahların sayı azalaraq 4,9-dan 3,8-ə, boşanmaların sayı isə 2-dən 1,9-a enib.

Nikaha daxilolma səviyyəsi Şərqi Zəngəzur (4,8), Qarabağ (4,6), Bakı, Dağlıq Şirvan, Qazax-Tovuz (4,0) və Lənkəran-Astara (3,9) iqtisadi rayonlarında ölkə göstəricisindən (3,8) yüksək olub.

Cari ilin yanvar-iyun ayları ərzində Daxili İşlər Nazirliyi və Dövlət Miqrasiya Xidmətinin müvafiq qurumları tərəfindən daimi yaşamaq üçün Azərbaycana 2 min 85 nəfər gələn, ölkədən isə 1159 nəfər gedən qeydə alınıb. Miqrasiya saldosu ölkə üzrə müsbət 926 nəfər təşkil edib.