"Ukrayna, Qəzza və İran məsələlərində sürətli qələbələr vəd edən Tramp gözlədiyindən daha mürəkkəb reallıqla üz-üzə qalıb..."

ABŞ prezidenti Donald Tramp hakimiyyətə qayıdarkən bir sıra beynəlxalq münaqişələri qısa müddətdə həll edəcəyini bildirirdi. Aylar keçdikcə Ağ Evin qarşılaşdığı problemlər daha da mürəkkəbləşir və vəd edilən diplomatik uğurlar hələ də görünmür.

Bu barədə "The New York" Times" nəşri yazıb.

İran məsələsində gözlənilən nəticə əldə olunmadı

Qəzetin fikrincə, Tramp administrasiyası İranla bağlı sürətli nəticələr əldə edəcəyinə ümid bəsləyirdi. Vaşinqton hesab edirdi ki, hərbi təzyiq və sərt bəyanatlar Tehranın geri addım atmasına səbəb olacaq. Lakin atəşkəsdən sonra da əsas problemlər - İranın nüvə proqramı və raket imkanları - gündəmdə qalır.

Məqalədə qeyd olunur ki, İran rəhbərliyi ABŞ-ın yeni genişmiqyaslı hərbi əməliyyatlara başlamaqda maraqlı olmadığını anlayır. Buna görə də Tehran danışıqları uzatmağa və vaxt qazanmağa çalışır. Ekspertlərin fikrincə, qarşıdakı müzakirələr aylarla, hətta illərlə davam edə bilər.

Ukrayna müharibəsi də Ağ Evin planlarını pozub

Nəşr xatırladır ki, Tramp seçki kampaniyası dövründə Ukrayna müharibəsini çox qısa müddətdə dayandıracağını bildirirdi. Lakin münaqişə davam edir və tərəflər arasında ciddi fikir ayrılıqları qalır. Məqalədə vurğulanır ki, həm Moskva, həm də Kiyev artıq birdəfəlik görüşlər və telefon danışıqları ilə deyil, daha sistemli diplomatik proseslə maraqlanır.

Rusiyada hesab edirlər ki, danışıqlar daimi işçi qrupları və müntəzəm təmaslar vasitəsilə aparılmalıdır. Bu isə Ağ Evin sürətli həll planlarına uyğun gəlmir. ABŞ dövlət katibi Marko Rubio da son çıxışlarında danışıqların gözləniləndən daha çətin getdiyini etiraf edib.

Qəzzada da vəziyyət dəyişmir

Nəşr yazır ki, Tramp administrasiyası Qəzzada da sürətli siyasi dönüş gözləyirdi. Planlara görə, HƏMAS silahsızlaşdırılmalı, bölgədə yeni idarəetmə sistemi qurulmalı və genişmiqyaslı bərpa işləri başlamalı idi. Lakin aylar keçməsinə baxmayaraq bu məqsədlərin əksəriyyəti reallaşmayıb.

HƏMAS fəaliyyətini davam etdirir, Qəzzada humanitar vəziyyət ağır olaraq qalır və İsrail hərbi əməliyyatlarını dayandırmayıb. Bölgənin yenidən qurulması ilə bağlı layihələr isə hələ başlanğıc mərhələsindədir. Qəzetin qənaətinə görə, Trampın əsas problemi beynəlxalq münaqişələrin mürəkkəbliyini lazımınca qiymətləndirməməsidir.

Ekspertlər hesab edirlər ki, Ukrayna, İran və Qəzza kimi böhranlar sürətli bəyanatlar və qısamüddətli təzyiqlərlə deyil, uzunmüddətli diplomatik fəaliyyət və davamlı siyasi proseslərlə həll oluna bilər. Məhz buna görə də Ağ Evin vəd etdiyi "asan qələbələr" hələlik reallığa çevrilməyib.