Son günlər sosial şəbəkələrdə yayılan və orta təhsil müəssisələrindən birində çəkildiyi iddia olunan video cəmiyyətdə ciddi narahatlığa səbəb olub.

Görüntülər qısa zamanda geniş müzakirələr yaradaraq təhsil mühitində etik və psixoloji təhlükəsizlik məsələlərini yenidən gündəmə gətirib.
Yayımlanan videoda şagirdlərin yarış adı altında təşkil edilən oyunda fiziki sərhədlərin qorunmadığı açıq şəkildə müşahidə olunur. Xüsusilə diqqət çəkən məqam ondan ibarətdir ki, qız şagirdlər masanın ön hissəsində əyləşdiyi halda, arxa tərəfdə olan oğlan şagirdlər onların hərəkətlərinə fiziki müdaxilə edir və bu proses sosial media üçün “kontent” xarakteri daşıyır.

Bu cür davranışlar nə pedaqoji prinsiplərə, nə də məktəbin tərbiyəvi funksiyasına uyğun gəlir. Təhsil müəssisəsi əyləncə və reytinq məkanı deyil, şagirdlərin təhlükəsiz, hörmətə əsaslanan və psixoloji baxımdan qorunduğu bir mühit olmalıdır. Şagirdlər arasında cinsi və fiziki sərhədlərin aşılması isə gələcəkdə daha ciddi psixoloji travmalara və davranış pozuntularına zəmin yarada bilər.

Mütəxəssislər bildirirlər ki, bu tip “oyunlar” uşaqlarda normanın təhrif olunmasına, zorakılığın və hörmətsiz davranışların adi hal kimi qəbul edilməsinə səbəb olur. Xüsusilə sosial şəbəkələrdə paylaşılmaq məqsədilə təşkil edilən bu cür fəaliyyətlər məktəb mühitinin mahiyyətinə ziddir və ciddi nəzarət mexanizmlərinin vacibliyini ortaya qoyur.

Valideyn, müəllim və məktəb rəhbərliyi bu kimi hallara biganə qalmamalı, məktəbdaxili qaydalar, etik davranış kodeksi və şagirdlərin hüquqlarının qorunması istiqamətində ardıcıl və prinsipial mövqe nümayiş etdirilməlidir. Unudulmamalıdır ki, məktəbdə baş verən hər bir hadisə təkcə bir “video” deyil, gələcək cəmiyyətin formalaşmasına birbaşa təsir göstərən faktordur.

Həmin videonu sizlərə təqdim edirik: