Bakının mərkəzində, paytaxtın ən çox ziyarət edilən ərazilərindən biri olan “Torqovıy”da səbəbi və hüquqi əsası məlum olmayan qazıntı işləri aparılır.

Patrul.az-ın məlumatına görə, sözügedən hal Hacı Zeynalabdin Tağıyev küçəsindən Fəvvarələr meydanına çıxan hissədə qeydə alınıb.

Redaksiyamıza daxil olan videogörüntülərdən görünür ki, ərazidə döşənmiş daş plitələr sökülərək yol örtüyünə ciddi ziyan vurulub.

Diqqət çəkən məqamlardan biri isə işləri aparan şəxslərin heç bir dövlət qurumunun işçi geyimində olmamasıdır. Bu hal qazıntı işlərinin rəsmi qurumlar tərəfindən icra edilmədiyi ehtimalını gücləndirir.

İddialara görə, söküntü işlərini həyata keçirən şəxslər yaxınlıqda açılması planlaşdırılan marketin fəhlələridir.

Qeyd edək ki, “Torqovıy” kimi turistik və tarixi əhəmiyyət daşıyan ərazidə qanunsuz və nəzarətsiz qazıntı işlərinin aparılması şəhər infrastrukturuna ziyan vurmaqla yanaşı, ictimai təhlükəsizlik baxımından da risk yaradır.

Məsələ ilə bağlı aidiyyəti dövlət qurumlarının mövqeyini öyrənməyə çalışacağıq.