Türkiyədə meşəyə göbələk yığmağa gedən Şenol Diktepe təsadüfən meteorit tapıb.

Bu barədə "Haber Global" məlumat yayıb.

Bildirilib ki, Karabük vilayətinin Eskipazar rayon sakini istirahət zamanı quruluşuna və çəkisinə görə digər daşlardan fərqlənən bir parça tapıb. O, maraqlı tapıntını Karabük Universitetinin mütəxəssislərinə təqdim edib.

Aparılan analizlər nəticəsində təxminən 250 qram ağırlığında olan daşın həqiqətən də səma cismi - meteorit olduğu müəyyən edilib.

"Daşın fərqli və ağır olduğunu hiss etdim, maraq üçün götürdüm. Professorumuz baxanda bunun meteorit olduğunu söylədi", - deyə Diktepe bildirib. O, tapıntısına görə çox sevindiyini də əlavə edib.

Diktepe onu da qeyd edib ki, daşın tərkibindəki metallara dair daha ətraflı analiz aparılacaq.