İspaniya sakini Antonio Lamelas öz ailəsindən 35 nəfərin ölümünə səbəb olan nadir və qorxunc xəstəliyin təfərrüatını paylaşıb.

Oxu.Az xəbər verir ki, bu barədə "El Periodico de España" (PE) nəşri yazıb.

A.Lamelasın yaxınlarına son dərəcə nadir genetik xəstəlik olan "ölümcül ailəvi yuxusuzluq" diaqnozu qoyulub. Qurbanlar arasında onun oğlu Visente də var. Atasının sözlərinə görə, xəstəlik ilk olaraq yerimə qabiliyyətinin itirilməsi ilə başlayıb, daha sonra udma çətinliyi və hərəkət idarəsinin tam itirilməsi ilə davam edib.

Nevroloq Selia Qarsiya Malo izah edir ki, bu patologiya adi yuxu pozuntularından köklü surətdə fərqlənir. Xəstəlik zamanı beynin talamus bölgəsi (yuxu və oyanıqlıq dövrlərini tənzimləyən mərkəz) sıradan çıxır. Nəticədə insan fiziki olaraq yuxuya getmək qabiliyyətini itirir və beyin sürətlə deqradasiyaya uğrayır.

Mütəxəssis qeyd edib ki, xəstəlik adətən 30-60 yaşlarında özünü büruzə verir. İlkin simptomlar yaddaş itkisi, hərəkət pozuntuları və əzələ qıcolmalarıdır. Zaman keçdikcə xəstələrdə hallüsinasiyalar və göz hərəkətlərində ciddi çətinliklər yaranır. Simptomlar aşkarlandıqdan cəmi bir neçə ay sonra xəstəlik ölümlə nəticələnir.

Hazırda bu xəstəliyin effektiv müalicəsi yoxdur. Xəstəlik autosom-dominant yolla ötürülür, yəni valideynlərin birindən qüsurlu genin ötürülməsi kifayətdir. Dünyada bu patologiyanı daşıyan cəmi 40-a yaxın ailənin olduğu bildirilir.