Türkiyədə silah əldə etmə qaydalarının sərtləşdirilməsi ilə bağlı qərarlar təhlükəsizlik məsələlərinin aktuallaşması fonunda geniş müzakirə olunur. Bu addımın effektivliyi və cəmiyyətin təhlükəsizliyinə real təsiri ilə bağlı fərqli yanaşmalar mövcuddur. Bəs, belə məhdudiyyətlər cinayət və zorakılıq hallarının azalmasına nə dərəcədə təsir edə bilər və bu model Azerbaijan üçün də tətbiq oluna biləcək nümunə sayıla bilər?

Məsələ ilə bağlı Demokrat.az-a açıqlama verən təhlükəsizlik məsələləri üzrə ekspert Samir Nəbiyev bildirib ki, təkcə sərtləşdirilmiş qaydalar hər zaman möcüzə yaratmır.

"Türkiyədə son dövrlərdə baş verən iki hücumdan sonra ölkə rəhbərliyinin, o cümlədən Prezident Ərdoğanın məsələyə müdaxiləsi nəticəsində silah sahibləri üçün daha sərt qaydalar tətbiq edilir. Burada əsas məsələ effektivliyin bir amildən asılı olmasıdır: məhdudiyyətlərin kağız üzərində qalmaması və icra prosesində şəffaf şəkildə həyata keçirilməsi. Türkiyədə artıq silah əldə etmə prosesi sağlamlıq arayışı, biometrik məlumatlar (foto, barmaq izi və s.) kimi ciddi nəzarət mexanizmləri ilə tənzimlənir. Buna baxmayaraq, Türkiyə ilə Azərbaycan arasında bu sahədə ciddi fərqlər mövcuddur. Türkiyədə silah əldə etmə prosesi nisbətən daha əlçatan hesab olunur, Azərbaycanda isə bu proses daha sərt və çoxpilləli nəzarət mexanizmi ilə həyata keçirilir. Azərbaycanda mülki silah əldə etmək üçün polis orqanlarına müraciət edilir, tibbi arayış və xüsusi icazə tələb olunur və ümumilikdə daha ciddi lisenziya sistemi mövcuddur".