Mağazadan alınan yumurta, yoxsa kənd yumurtası? İllərdir davam edən bu müzakirələrə nöqtə qoyacaq maraqlı sınaq keçirilib. Şəhər kənarında yaşayan və qonşularının hər gün "təbii daha dadlıdır" deyib təriflədiyi kənd yumurtalarından bezən bloqer nəhayət, hər iki məhsulu qarşı-qarşıya qoyub. Nəticə isə bir çoxları üçün gözlənilməz olub.

Sarısının rəngi sizi aldatmasın

Hamımız öyrəşmişik ki, kənd yumurtasının sarısı tünd, narıncıya çalan rəngdə olmalıdır. Amma sınaq zamanı məlum olub ki, mağazadan alınan ən ucuz yumurtanın sarısı kənd yumurtasından daha parlaqdır. Məsələ burasındadır ki, iri quşçuluq fabriklərində toyuqların yeminə xüsusi əlavələr qatılır. Bu da yumurtanın sarısının daha cəlbedici görünməsinə səbəb olur. Kənd toyuqlarında isə bu rəng tamamilə yediyi otdan və mövsümdən asılıdır.

Qabıq qalınlığı və təmizlik

Mağaza yumurtalarının qabığı daha qalın və möhkəm çıxıb. Bu, fabriklərdə toyuqlara verilən kalsiumla bağlıdır ki, daşınma zamanı məhsul qırılmasın. Təmizlik məsələsində də kənd yumurtaları uduzub. Üzərindəki ləkələr və çirklər ilk baxışdan "təbiilik" nişanəsi kimi görünsə də, əslində salmonelyoz riskini artırır. Mütəxəssislər xəbərdarlıq edir ki, mənşəyindən asılı olmayaraq, yumurtanı istifadə etməzdən əvvəl mütləq yumaq lazımdır.

Dad fərqi var?

Ən əsas məqam isə dad sınağıdır. Bloqer hər üç növ yumurtadan qayğanaq hazırlayıb və dadına baxıb. Təəccüblü də olsa, dadlar arasında ciddi bir fərq hiss olunmayıb. Nə qonşuların təriflədiyi o "xüsusi" dad tapılıb, nə də mağaza məhsulunda süni bir tam hiss edilib.

Nəticədə məlum olur ki, bahalı kənd yumurtasına artıq pul ödəmək hər zaman özünü doğrultmur. Əgər güvəndiyiniz, tanıdığınız bir təsərrüfat yoxdursa, mağaza yumurtası həm daha ucuz, həm də sanitar baxımdan daha təhlükəsiz seçim ola bilər. Seçim isə hər zaman olduğu kimi istehlakçınındır.
demokrat.az