1000-dən çox turizm sənayesi mütəxəssisi 2026-cı il üçün dünyanın ən yaxşı çimərliklərinin siyahısını tərtib edib. Qiymətləndirmə zamanı təbii unikallıq, təcrid səviyyəsi, suyun təmizliyi, turistlərin sayı və ümumilikdə "ideal tətil hissi" kimi meyarlar nəzərə alınıb.

Qaynarinfo xəbər verir ki, bu barədə "Independent" yazıb.

Birinci yer Filippində, Palavan adasında yerləşən Entalula çimərliyinə verilib. Ekspert Saymon Kolder onu unikal təbii landşaftına görə yüksək qiymətləndirib: ağ qum, şəffaf su və “kinematik” görünüş yaradan əhəngdaşı qayalıqları. Çimərlik demək olar ki, toxunulmamış və ən sakit yerlərdən biri hesab olunur.

İkinci yer Yunanıstanda, Kefaloniya adasında yerləşən Fteri çimərliyinə məxsusdur. O, yüksək qayalarla əhatə olunmuş tənha bir körfəzdə yerləşir və demək olar ki, “gizli” görünür. Burada ağ çınqıl və qum qarışır, su isə parlaq firuzəyi rəngi ilə seçilir. Ora çatmaq çətindir – ya dik cığırla piyada, ya da qayıqla, bu da sakit atmosferi qoruyur.

Üçüncü yer Avstraliyanın Qərbi hissəsində yerləşən Uorton çimərliyinə verilib. Bu, siyahıdakı ən uzaq və ən “vəhşi” çimərliklərdən biridir. Burada tam sakitlik, infrastrukturun olmaması və uzun ağ qum zolağı əsas üstünlüklər sayılır. Ziyarətçilər burada dəniz heyvanlarını təbii mühitdə müşahidə edə bilirlər.

Dördüncü yeri Madaqaskarda yerləşən Nosy İranja adası tutub. O, iki kiçik adanı aşağı su çəkilməsi zamanı birləşdirən unikal qum dili və zəngin dəniz həyatı, o cümlədən burada yumurtlayan dəniz tısbağaları ilə tanınır.

Beşinci yer Fici adalarında, Vomo adasında yerləşən East Beach çimərliyinə verilib. Bu, sakit tropik çimərlikdir və üzmək üçün ideal şəraitə malikdir. Yumşaq qumu və demək olar ki, dalğasız suyu ilə seçilir. Vomo adası lüks istiqamət hesab olunsa da, eyni zamanda təcrid olunmuş və özəl atmosferi qoruyur.

Siyahının ilk onluğuna həmçinin Angilyada Shoal Bay East, Maldivdə Digura, Meksikada Playa Balandra, Kambocada Koh Rong və Taylandda Donald Duck Bay daxil olub.

Yunanıstan, Tayland və Avstraliya 2026-cı ildə ən populyar çimərlik ölkələri olub və hər birindən üç çimərlik siyahıya düşüb.