Çin Cənubi Çin dənizində mübahisəli ada yaxınlığında ABŞ hərbi gəmisinin görünməsini pisləyib, bunu «ciddi provokasiya» adlandırıb.

İyulun 2-də «USS Stethem» esminesi Triton adasının 12 dəniz mili məsafəsinə yaxınlaşıb. Bu ada Cənubi Çin dənizindəki Parasel adalarının bir hissəsidir. Çin, Tayvan və Vyetnam bu adayla bağlı ərazi iddiaları irəli sürür.

ABŞ rəsmilərinin sözlərinə görə, adaya yaxınlaşmaqla Birləşmiş Ştatlar ərazi iddialarını tanımadığını sərgiləyib.

12 dəniz mili beynəlxalq miqyasda tanınan sərhəd limitini nümayiş etdirir.

Çin Xarici İşlər Nazirliyinin sözçüsü Lu Kang deyib ki, ABŞ-ın əməliyyatı Çinin suverenliyini, sülh və təhlükəsizliyi pozub.

«Çin tərəfi milli suverenliyi və təhlükəsizliyi qorumaqdan ötrü gərəkən addımları atacaq», – Lu deyib.