21 yaşlı britaniyalı ənənəvi ali təhsildən imtina edərək dülgərlik sənətini seçib. İndi onun illik gəliri 50 min funt-sterlinqə, yəni təxminən 70 min dollara çatır. Gənc növbəti beş il ərzində gəlirini iki dəfə artırmağı planlaşdırır.

"The Times of India"ya xəbər verir ki, 21 yaşlı Hyüqo Helms 15 yaşında universitetə getməkdən imtina edərək dülgər peşəsini seçib. Hazırda onun öz biznesi var. O, qazandığı pulla ilk evini almaq üçün vəsait toplayır və növbəti beş il ərzində illik gəlirini 100 min funt-sterlinqə çatdırmağı hədəfləyir.

Hyüqo Hempşir qraflığının Portsmut şəhərində yaşayır. Məktəbdə yaxşı oxuyur və ən güclü siniflərdən birində təhsil alırdı. Buna görə də universitetə daxil olmaq onun üçün təhsilin məntiqli davamı hesab olunurdu.

Lakin doqquzuncu sinifdə gənc praktiki işlə məşğul olmaq istədiyini anlayıb. Bir dəfə dram dərsində şagirdlər praktiki məşğələ əvəzinə “Billy Elliot” filminə baxıb onun nəzəri aspektlərini müzakirə ediblər.

“Məndə belə bir hiss yarandı ki, sadəcə vaxtımı boş yerə sərf edirəm”, deyə Hyüqo bildirib.

Bundan sonra o, valideynlərinə universitetə hazırlaşmaq əvəzinə peşə təhsili almaq istədiyini deyib. Valideynləri onun qərarını dəstəkləyib. Gənc orta məktəbi tərk edib və bir il ərzində anası ilə birlikdə evdə təhsil alıb.

Eyni zamanda peşə təhsilinə qəbul üçün tələb olunan riyaziyyat və ingilis dili imtahanlarını verib və hər iki fəndən B qiymətinə ekvivalent olan 5 bal alıb.

2021-ci ildə Hyüqo dülgərlik və ağac emalı ilə bağlı ixtisas üzrə təhsilə başlayıb. Təxminən beş il ərzində birinci və ikinci səviyyə kvalifikasiyalar əldə edib və öz biznesini qurub.

Hazırda Hyüqo ənənəvi Viktoriya dövrü şkafları və sifarişlə mebellər hazırlayır, iri spiral pilləkənlər, asma eyvanlar, mətbəxlər və dam örtükləri quraşdırır. Onun illik gəliri 50 min funt-sterlinqə qədər yüksələ bilir.

Gənc bu peşənin ona müstəqillik və məsuliyyət hissi verdiyini deyir: “Mən özümü yetkin hiss edirəm və mənə də belə münasibət göstərirlər. Hazırda gördüyüm iş böyük məsuliyyət tələb edir və həqiqətən də əhəmiyyətlidir”.

Onun sözlərinə görə, dülgərin işi real nəticələrlə bağlıdır. Məsələn, dam örtüyünü düzgün quraşdırmamaq bütöv bir ailənin təhlükəsizliyini riskə ata bilər.

Britaniyalı gənc peşəsinin üstünlüklərindən birini onun süni intellektin inkişafına davamlı olması hesab edir. O düşünür ki, evlərdə konstruksiyaların birbaşa hazırlanmasını və quraşdırılmasını tələb edən fiziki işlərin texnologiyalar tərəfindən tamamilə əvəzlənməsi çətin olacaq.

Hyüqo hesab edir ki, peşəkar fəhlə və sənətkarlıq ixtisaslarına tamhüquqlu karyera kimi yanaşmaq lazımdır. Onun fikrincə, bu peşələr universitetə qəbul ola bilməyənlər üçün ehtiyat variantı kimi qəbul edilməməlidir.

“Peşəkar sənət sadəcə iş deyil, bəşəriyyətin təməlidir. Ona son seçim kimi deyil, insanın fəxr edə biləcəyi bir çağırış kimi daha çox yanaşmaq lazımdır”, deyə o bildirib.

Hyüqo paralel olaraq gənclərin fəhlə və texniki peşələrlə tanış olmasına da kömək edir. O, peşə təhsili almaq və praktiki bacarıqlar əldə etmək istəyənləri dəstəkləyən “Toolkit Conduct” layihəsini yaradıb.

Gənc məktəblərdə və kolleclərdə seminarlar və çıxışlar keçirir. Lakin onun sözlərinə görə, layihəsi hələlik gəlir gətirmir.

Hazırda Hyüqo ilk evini almaq üçün pul yığır. Qazancının bir hissəsini isə öz biznesinə və peşəkar avadanlıqlara yatırır.

Onun sözlərinə görə, bu iş ona pikap avtomobili və bahalı avadanlıqlar, o cümlədən kəsici və istiqamətləndirici mişarlar, həmçinin pnevmatik mismar tapançası almağa imkan verib.

Yaxın beş il ərzində o, illik gəlirini 100 min funt-sterlinqə çatdırmağı və “Toolkit Conduct” layihəsini genişləndirməyi planlaşdırır. Gələcəkdə Hyüqo qazandığı pullardan istifadə edərək öz daşınmaz əmlak portfelini yaratmaq istəyir.

“Mən sübut edirəm ki, yaxşı gəlir əldə etmək üçün mütləq universitet diplomuna sahib olmaq lazım deyil”, deyə o qeyd edib.