Belçika hökuməti Türkiyə ilə Avropa Birliyi arasında keçiriləcək zirvə görüşündən əvvəl bir skandala imza atıb. Avropa.info xəbər verir ki, Belçika hökuməti zirvə görüşünün keçiriləcəyi Avropa Birliyi Şurasının binasının arxasında PKK terror təşkilatına çadır qurmağa icazə verib.
Türkiyədə xarici işlər naziri Mövlud Çavuşoğlu, ədliyyə naziri Bəkir Bozdağ, daxili işlər naziri Əfqan Alə ilə Belçikanın baş nazirinin müavini və xarici işlər naziri Didier Reynders, daxili işlər naziri Jan Ham və ədliyyə naziri Koen Geensin iştirakı ilə keçirilən görüşdən bir həftə sonra PKK terror təşkilatının tərəfdarları yeni bir addım atıb.
PKK tərəfdarları hökumətdən aldıqları icazə sayəsində baş nazir Əhməd Davudoğlunun da iştirak edəcəyi Türkiyə-Avropa Birliyi zirvəsinin Brüsseldə keçiriləcəyi AB Şurası binasının arxasına çadır qurub.

Terror təşkilatının Belçikadakı liderlərindən Rəmzi Kartalın Türkiyənin cənub şərqində həyata keçirilən əməliyyatları tənqid üçün mətbuat konfransı təşkil etdiyi çadır hələ də yerində qalır.
Terror təşkilatının simvolları ilə bəzədilmiş çadırın ətrafında az sayda polisin təhlükəsizlik tədbirləri üçün dayandığı müşahidə olunur.