Gürcüstan parlamentinin bugünkü iclası qalmaqalla başlayıb.
Haqqın.az saytının Gürcüstan bürosundan verilən xəbər görə, iclasda çıxış etmiş, Axalkalakini təmsil edən deputat Samvel Petrosyan (“Gürcü arzusu” fraksiyası) AŞPA-dakı Gürcüstan nümayəndə heyətinə Robert Uolterin hazırladığı “Dağlıq Qarabağda və Azərbaycanın digər işğal olunmuş ərazilərində zorakılığın artması” məruzəsini sözsüz dəstəklədiyinə görə iradlarını bildirib.
“Bununla biz Ermənistanla münasibətlərimizə xələl gətiririk”, – S.Petrosyan belə deyib.
Petrosyanın çıxışı müxalif “Vahid milli hərəkat”dan deputat olan Azər Süleymanovun qəzəbinə səbəb olub.
“Gürcüstan da Azərbaycan kimi ərazilərinin işğalından əziyyət çəkir. Məhz buna förə də, AŞPA-da bizim nümayəndə heyətinin Azərbaycan ərazilərini işğal etmiş Ermənistanı dəstəkləməsindən söhbət də gedə bilməzdi. İnanıram ki, gec-tez Azərbaycan da, Gürcüstan da öz ərazi bütövlüyünü bərpa edəcəklər”, – Süleymanov belə deyib.