Səudiyyə Ərəbistanının "Saudi Arabian Oil Co." (Saudi Aramco) dövlət neft şirkəti milyardlarla dollarlıq aktivlərinin satış imkanını nəzərdən keçirir.

Oxu.Az xəbər verir ki, bu barədə "Bloomberg" məlumat yayıb.

Bildirilir ki, şirkət neft ixrac terminalındakı və neft anbarındakı payını sata bilər. İnvestisiya banklarına ayrılacaq potensial aktivlərin hərtərəfli qiymətləndirilməsi üçün tenderdə iştirak etmək təklif olunub. Aktivlərin dəyəri 10 milyard dolları keçə bilər.

"Saudi Aramco" sövdələşmələr çərçivəsində yeni səhmdar kapitalının cəlb edilməsini də nəzərdən keçirir. Üstəlik, şirkət "Global Infrastructure Partners"la ("BlackRock"un nəzarətində olan GIP) "Jafurah" qaz layihəsi ilə bağlı son sövdələşməyə analoji strukturdan istifadə edə bilər. Bu sövdələşmə zamanı "Saudi Aramco" və GIP birgə müəssisə yaradıblar və layihəyə xidmət edən aktivlər ona icarəyə verilib.

Mənbələrdən birinin sözlərinə görə, "Saudi Aramco"nun aktivləri bütün dünya şirkətləri arasında böyük marağa səbəb olub və bankçılar artıq onların ayrılması üçün bir neçə plan təqdim ediblər. Şirkətin neft ixracı terminalı və neft anbarı çox gəlirli aktivdir. Şirkət onun satışı üçün rəsmi prosesə gələn ilin əvvəlində start verə bilər.