ABŞ sakinləri noyabrın 28-də "Qara cümə"də onlayn alış-verişə rekord 11.8 milyard dollar xərcləyiblər. Bu, keçən illə müqayisədə 9.1% daha çoxdur.

Moderator.az xəbər verir ki, bu barədə internet mağazalarının məlumatlarını izləyən "Adobe Analytics"ə istinadən "Reuters" məlumat yayıb.

Qeyd olunub ki, ən populyar məhsul kateqoriyaları geyim və aksesuarlar olub. "Adobe Analytics"in proqnozlarına əsasən, noyabrın 29-da amerikalılar alış-verişə 5.5 milyard dollar (illik 3.8% artım), noyabrın 30-da isə 5.9 milyard dollar (illik 5,4% artım) xərcləyəcəklər. Şirkət gözləyir ki, "Kiber bazar ertəsi"ndə ("Cyber Monday" (dekabrın 1-də) ölkə sakinləri 14.2 milyard dollarlıq alış-veriş edəcəklər. Bu, keçən illə müqayisədə 6.3% daha çoxdur.

Bu il endirimlər bir çox idxal mallarına ABŞ-nin tətbiq etdiyi rüsumlar səbəbindən iqtisadi qeyri-müəyyənlik fonunda başlayıb. Qeyd olunur ki, bu həm pərakəndə satıcılar, həm də istehlakçılar üçün xərclərin artmasına səbəb olub.