Hesablama Palatasının audit hesabatı “Azərenerji”də milyonların necə “əridiyini” açıq şəkildə ortaya qoyur. 2022–2024-cü illəri əhatə edən yoxlamada 255,8 milyon manatdan çox vəsaitin taleyi araşdırılıb və nəticə heç də ürəkaçan deyil.

Tribuna.az xəbər verir ki, söhbət təkcə texniki səhvlərdən getmir – bu, sistemli səhlənkarlıq və idarəetmədə ciddi boşluqların göstəricisidir. Kiçik Su Elektrik Stansiyaları layihələri texniki-iqtisadi əsaslandırma olmadan prioritet siyahıya salınıb. Nəticə? Tikilib istifadəyə verilən 7 stansiya cəmi 14,7–46% güclə işləyir.
Bu isə yüz milyonların səmərəsiz xərclənməsi deməkdir.

Auditin üzə çıxardığı digər faktlar isə daha ağırdır: smetada olmayan işlər müqavilələrə salınıb, görülməyən işlərin pulu xərclərə əlavə edilib. Yəni kağız üzərində “iş görülüb”, amma reallıqda bunun qarşılığı yoxdur. Bu isə artıq açıq şəkildə maliyyə intizamının pozulmasıdır.

Satınalma prosesində isə vəziyyət daha acınacaqlıdır – tender sənədləri qaydalara uyğun tərtib olunmayıb, komissiyaların fəaliyyəti formal xarakter daşıyıb, maliyyə idarəetməsi isə nəzarətsiz qalıb. Dövlət vəsaiti ilə bağlı bu qədər səhlənkarlıq təsadüfi görünmür.

Daha bir diqqətçəkən məqam: alınmış materialların bəzisi məsul şəxslərə təhvil verilməyib, aktivlər uçota alınmadan istifadə olunub. Bu isə faktiki olaraq dövlət əmlakının “itməsi” riskini yaradır.

Ən maraqlısı isə budur ki, tikintisi başa çatan 7 stansiya istismara verilsə də, onların rəsmi qəbul prosedurları belə tamamlanmayıb. Yəni obyekt var, amma sənədləşmə yox – klassik “yarımçıq iş” modeli.

Bütün bu faktlar fonunda sual açıq qalır: 255,8 milyon manatlıq vəsaitin nə qədər hissəsi real nəticəyə çevrilib? Auditin dili ilə desək – çox az.

Reallıq isə daha sərtdir: dövlət investisiyaları planlaşdırılmadan xərclənib, nəzarətsiz icra olunub və nəticədə səmərəsiz layihələrə çevrilib.

Bu mənzərə artıq təkcə nöqsan yox, yüz milyonluq yeyinti iddialarını gündəmə gətirir. Və bu sualların cavabı cəmiyyətə verilməlidir.

Qeyd edək ki, “Azərenerji” Açıq Səhmdar Cəmiyyətinin İdarə Heyətinin sədri Baba Rzayevdir. O, 4 sentyabr 2018-ci ildən bu vəzifədədir.