SEAMAJESTY və MILOS tankerləri XBK-nın iki tək nöqtəli lövbər məntəqəsində yükləyir

Xəzər Boru Kəməri Konsorsiumu (XBKK) neft qəbulunu və yüklənməsini bərpa edib. AYNA.AZ xəbər verir ki, bu barədə Qazaxıstan Energetika Nazirliyinin məlumatında qeyd edilib.

"Xəzər Boru Kəməri Konsorsiumu neft qəbulunu və Novorossiysk limanındakı dəniz terminalı vasitəsilə yükləmə əməliyyatlarını bərpa edib. Hazırda SEAMAJESTY və MILOS tankerləri XBK-nın iki tək nöqtəli lövbər məntəqəsində yükləyir. Hər iki gəmi “Tengizchevroil”dən neft qəbul edir", - deyə açıqlamada bildirilib.

Nazirlik qeyd edib ki, neft qəbulunun bərpası neft şirkətlərinə boru kəməri sisteminə xam neft tədarükünü davam etdirməyə və dəniz terminalı vasitəsilə ixrac əməliyyatlarını bərpa etməyə imkan verir.

"Dəniz terminalında sonrakı əməliyyatlar mövcud vəziyyətin qiymətləndirilməsi və zəruri təhlükəsizlik tələbləri nəzərə alınmaqla həyata keçirilir”, vurğulanıb.

Bildirilib ki, "Qazaxıstan Respublikası Energetika Nazirliyi XBK rəhbərliyi, əsas yük göndərənlər və prosesin digər iştirakçıları ilə daim əlaqə saxlayır".

Nazirlik vəziyyəti izləməyə və Qazaxıstan neftinin davamlı nəqlini təmin etməyə yönəlmiş tədbirləri əlaqələndirməyə davam edir.

Müəllif: Ayna.az