İxtisasca iqtisadçı olsa da, təbiətə bağlılığı onu 18 il əvvəl aqroturizm layihəsi yaratmağa təşviq edib. 8 hektarlıq ərazidə kənd təsərrüfatı, flora və fauna landşaftını birləşdirən unikal təsərrüfat formalaşdırıb.

Valyuta.az xəbər verir ki, söhbət BioGarden aqro-ekoparkının sahibi Etibar Nuriyevdən gedir.

E.Nuriyev qeyd edir ki, BioGardendə zəfəran, innab və ölkədə nadir rast gəlinən bitki növləri nümayiş olunur. Məqsəd isə Azərbaycanın kənd təsərrüfatı potensialını həm yerli, həm də xarici turistlərə tanıtmaqdır.

E. Nuriyev aqroturizm ideyasını Azərbaycana gətirən ilk şəxslərdən olduğunu deyir. O, Portuqaliyadan Çinə qədər müxtəlif ölkələrdə bu sahəni öyrənib və yerli şəraitə uyğunlaşdırıb. BioGarden-in layihəsi və idarəetmə modeli onun tərəfindən hazırlanıb və cəmi 8 nəfərlik komanda tərəfindən idarə olunur.

Qeyd edək ki, sözügedən məkana Azərbaycan vətəndaşları üçün giriş 5 manat, xarici turistlər üçün 10 manat müəyyən edilib. Qonaqlar üç saat ərzində ərazidə sərbəst gəzə, meyvələri dada və orqanik məhsullar toplaya bilirlər