Uzun illər ərzində enerji yığa bilən batareya müasir cihaz istifadəçiləri üçün arzuolunan texnologiyalardan biridir, çünki daim şarj etmə ehtiyacı ciddi çatışmazlıq hesab olunur. Bu səbəbdən çinli alimlər mühüm bir irəliləyiş əldə edərək insanlığı şarj cihazlarından asılılığın azalmasına bir addım da yaxınlaşdırıblar.

BGR.com-un məlumatına görə, "Beijing Betavolt New Energy Technology Company Ltd" şirkəti atom enerjisindən istifadə edərək elektrik istehsal edən “nüvə batareyası” hazırladığını açıqlayıb.

Bildirilir ki, bu batareya 50 ilə qədər fasiləsiz enerji təmin edə bilir. Eyni zamanda onun çox kiçik ölçüləri müxtəlif cihazlarda istifadəsini mümkün edir və onu universal həllə çevirir.

Alimlər izah edirlər ki, nüvə izotopları parçalanma zamanı enerji buraxır və yarımkeçirici çeviricilər bu enerjini elektrikə çevirə bilir. "Betavolt"un məlumatına görə, batareya nikel-63 izotopu əsasında hazırlanıb və enerji çevrilməsini asanlaşdırmaq üçün nazik almaz yarımkeçirici istifadə olunub.

Mütəxəssislərin fikrincə, bu texnologiya təsdiqlənərsə, onilliklər boyu enerji təmin edə bilən batareyaların yaradılması mümkün olacaq. Belə batareyaların süni intellektdən tutmuş aerokosmik sənayeyə qədər geniş istifadə sahələri ola bilər.

Qeyd olunur ki, bu sahədə tək "Betavolt" deyil, "Infinity Power" şirkəti də ABŞ Müdafiə Nazirliyinin dəstəyi ilə nüvə batareyası üzərində işləyir. Şirkət iddia edir ki, onların enerji çevirmə texnologiyası indiyədək əldə edilən ən yüksək ümumi səmərəliliyi təmin edir. Məlumata görə, onların sikkə formalı mini batareyası 100 ildən çox müddət ərzində onlarla millivat enerji verə bilər.

Nüvə batareyaları texnologiyada mümkün inqilab hesab olunsa da, hazırda şirkətlər kütləvi bazara çıxışdan əvvəl bu “əbədi” batareyaların təkmilləşdirilməsi üzərində işləyirlər.