Süni intellekt iş yerlərində məhsuldarlığı artırsa da, insanlar arasındakı ünsiyyəti zəiflətməyə başlayıb.

"ChatGPT" və "Claude" kimi alətlər əməkdaşların həmkarlarından daha az asılı olmasına səbəb olur və bu da iş mühitində sosial əlaqələrin zəifləməsinə gətirib çıxarır.

Məqalədə qeyd olunur ki, əvvəllər əməkdaşlar kiçik tapşırıqlar üçün dizayner, mühəndis və ya menecerlərlə daimi əlaqə saxlayırdısa, indi bir çox işi süni intellekt bir neçə saniyə ərzində həll edir. Nəticədə ofisdaxili ünsiyyət azalır.

ABŞ-də fəaliyyət göstərən "Zion HealthShare" şirkətinin marketinq direktoru Daniel Deceuster bildirib ki, süni intellektdən istifadə etdikdən sonra həmkarları ilə ünsiyyəti təxminən 50 faiz azalıb. Onun sözlərinə görə, məhsuldarlıq artsa da, insanlar arasındakı əlaqələrin zəifləməsi narahatlıq yaradır.

"Wharton" Universitetinin professoru Cessika Reif isə hesab edir ki, insanlar getdikcə tək işləməyə üstünlük verir. Araşdırmalara görə, süni intellektdən intensiv istifadə edən əməkdaşlar komandalarına daha az güvənir, daha çox tükənmişlik hiss edir və işdən ayrılmaq istəyinə daha meyilli olur.

Məqalədə vurğulanır ki, əvvəllər iş yerləri insanlar üçün əsas sosial məkanlardan biri idi. İş mühitində qurulan münasibətlər, gündəlik ünsiyyət və komanda işi əməkdaşların həm motivasiyasına, həm də psixoloji vəziyyətinə təsir göstərirdi. Lakin süni intellekt bir çox ünsiyyəti əvəz etdikcə, iş yerləri daha “təcrid olunmuş” mühitə çevrilə bilər.

Ekspertlər hesab edir ki, şirkətlər süni intellektdən istifadəni tam fərdi prosesə çevirmək əvəzinə, əməkdaşlar arasında əlaqələri qoruyan yeni iş modelləri formalaşdırmalıdır.