İsrailin Livandakı fələstinli qaçqın düşərgəsinə hücumu nəticəsində 13 nəfər ölüb.

“Referans MEDİA” xarici KİV-ə istinadən bildirir ki, Livanın Səhiyyə Nazirliyi çərşənbə axşamı İsrailin Livanın cənubundakı fələstinli qaçqın düşərgəsinə endirdiyi zərbələr nəticəsində 13 nəfər ölüb.

Nazirlik sahilyanı Sidon şəhərinin yaxınlığında yerləşən Ayn əl-Hilve düşərgəsinə edilən hücum nəticəsində daha bir neçə nəfərin yaralandığını bildirib. Təcili yardım maşınlarının insanları müalicə üçün hələ də yaxınlıqdakı xəstəxanalara daşıdığını qeyd edib. Nazirlik ətrafda yaşayan sakinləri qan verməyə çağırıb.

Dövlət Milli Xəbər Agentliyi, pilotsuz təyyarənin düşərgənin içərisində Xalid bin Əl-Valid məscidi yaxınlığında bir avtomobili hədəf aldığını bildirib. Daha sonra üç raket həm məscidi, həm də yaxınlıqdakı Xalid bin Əl-Valid Mərkəzini hədəfə alıb.

İsrail Müdafiə Qüvvələri (IDF) hücumun “İDF və İsrail dövlətinə qarşı terror hücumlarını planlaşdırmaq və həyata keçirmək” üçün istifadə olunan “HƏMAS-ın təlim kompleksi”ni hədəf aldığını açıqlayıb.

“İDF Livanda HƏMAS-ın yaradılmasına qarşı əməliyyatlar həyata keçirir və HƏMAS terrorçuları fəaliyyət göstərdikləri yerdən aslı olmayaraq əməliyyatlarına davam edəcək.”, – deyə məlumatda bildirilir.

Fələstin Azadlıq Təşkilatının Sidondakı yerli fraksiyaları hücumları qınayıb.