Braziliyada 62 yaşlı qadın 55 il ərzində eyni ailənin üç nəslinin evində faktiki köləlik şəraitində işlədikdən sonra xilas edilib. Bu hadisə ölkədə böyük rezonans doğurub.
Bu barədə İspaniyanın "El Pais" nəşri yazıb.

Uşaq yaşından istismara məruz qalıb

Mariya (əsl adı açıqlanmır) cəmi 7 yaşında ev qulluqçusu kimi işləməyə başlayıb. Bu illər ərzində o, heç vaxt əməkhaqqı almayıb, məzuniyyətə çıxmayıb, oxuyub-yazmağı öyrənməyib və ailəsi ilə əlaqəsini itirib.

Prokurorluğun məlumatına görə, qadın hər gün səhər tezdən oyanaraq yemək hazırlayır, ev işləri görür və uşaqlara baxırdı. O, aldığı yemək, geyim və sığınacağı əməyinin qarşılığı hesab etdiyindən istismara məruz qaldığını belə anlamayıb.

Ailə kompensasiya ödəyəcək

Araşdırmadan sonra ailə qadına 30 min dollar dəyərində mənzil və 10 min dollar təzminat verməyə razılaşıb. Bununla yanaşı, Mariyanın məhkəmə qaydasında əlavə hüquqlarını tələb etmək imkanı da saxlanılır. Səlahiyyətlilər bildiriblər ki, qadın hələlik keçmiş sahiblərinin evində qalacaq. Bunun səbəbi onun yaxın qohumlarının tapılmaması və müstəqil həyata hazır olmamasıdır.

Mütəxəssislər qeyd edir ki, uzun illər davam edən belə asılılıqdan sonra zərərçəkənin normal həyata qaytarılması uzunmüddətli sosial dəstək tələb edir. Bu hadisə Braziliyada ev qulluqçularının hüquqları və müasir köləlik problemləri ilə bağlı müzakirələri yenidən gündəmə gətirib.