Cefri Epşteyn sənədlərinin maliyyəçinin seks-trafiki və şantaj əməliyyatlarını üzə çıxaracağı gözlənilirdi. Amma çıxarmadı, çünki belə bir əməliyyatın mövcud olmaması üçün kifayət qədər ciddi əsaslar var idi.

Yenicag.az xəbər verir ki, bu barədə “The Wall Street Journal”ının təhlil məqaləsində qeyd olunub.

Bildirilib ki, indiyədək ortaya çıxan sənəd toplusundan anlaşılan əsas şey məhz belə bir sistemin mövcud olmamasıdır:

“Ötən ayın sonunda dərc edilən sonuncu hissədə FTB müstəntiqlərinin məruzə yer alır; orada qeyd olunur ki, Epşteynin yaşayış yerlərində və bank hesablarında hər hansı bir trafik şəbəkəsinə və ya şantaj üçün nəzərdə tutulduğu iddia edilən “seks videoları”na dair heç bir sübut tapılmayıb. Bu tapıntı Baş prokuror Pem Bondi və FTB direktoru Kaş Patelin daha əvvəlki sui-qəsd iddiaları ilə ziddiyyət təşkil edir. Başqa sözlə, Ədliyyə Nazirliyinin rəhbərləri bir trafik şəbəkəsini ifşa etmək istəyirdilər, lakin müstəntiqlər onlara “pis xəbər”i verməli oldular”.

Müstəqil jurnalist Maykl Treysi tərəfindən işıqlandırılan digər bir ifşaedici sənədin isə Nyu-Yorkun Cənub Dairəsi prokurorlarının 2019-cu ilin dekabrına aid 86 səhifəlik məruzəsi olduğu qeyd edilib. Vurğulanıb ki, Epşteynin əlaltılarına qarşı sübut toplamaq məqsədi daşıyan bu məruzədə seks köləliyinin və şantaj şəbəkəsi hekayələrinin əsas mənbəyi olan ittihamçı Virciniya Cuffre, əslində, uydurmaçıdır və məhkəmə şahidi kimi tamamilə etibarsızdır:

“Epşteynin cinayətlərinin yalnız özü və başda Qislen Maksvell olmaqla, bir neçə köməkçisi ilə məhdudlaşması, bütün pislikləri gizli qruplaşmaların (“cabals”) fəaliyyəti ilə əlaqələndirməyə çalışan nüfuz sahibləri və siyasətçilər üçün dözülməz idi. Taker Karlson (Tucker Carlson) Epşteynin düşmənlərini şantaj etmək üçün MOSSAD ilə işlədiyini ehtimal edirdi. Nümayəndələr Palatasında Tomas Massi, Ro Khanna və Ceymi Raskin də daxil olmaqla, bir qrup radikal Epşteynin varlı və nüfuzlu şəxslərə iyrənc yollarla xidmət etdiyini amansızcasına iddia edirlər. Bu “şoumenlər” hələ də “dezinformasiya” əleyhinə olan kütlədən hər hansı bir tənqid almayıblar”.

Məqalə müəllifləri konqresi nəticələri onilliklər boyu davam edəcək qorxaq bir addım ataraq, bu sənədlərin dərc edilməsini tamamilə siyasi səbəblərdən tələb etdiyini bildiriblər. Nəşrə görə, demokratlar prezident Donald Trampın Epşteynin “müştərisi” kimi üzə çıxacağından əmin idilər, respublikaçılar isə Bill Klintonun şəhvət düşkünlüyünü ictimaiyyətə xatırlatmağa ümid edirdilər.

“Cənab Trampın düşmənlərinin təəssüfünə görə, sənədlərin son hissəsi onun Epşteyn və onun hərəmi ilə vaxt keçirməsi ideyasına şübhə salır. Bir FTB sənədi 2006-cı ildəki bir söhbəti qeyd edir: cənab Tramp Palm-Biç polis rəisinə zəng edərək Epşteyn və xanım Maksvellin davranışlarından xəbərdar olduğunu və bunu “iyrənc” hesab etdiyini bildirib. O, polis rəisinə xatırladıb ki, bir dəfə Epşteynin yanında olarkən yeniyetmə qızlar gəlib və o, “dərhal oradan uzaqlaşıb”.

“Nəticədə, ortada nə seks-köləliyi şəbəkəsi, nə şantaj əməliyyatı, nə sonradan istifadə üçün görüşləri qeydə alan kameralar, nə də “müştəri siyahısı” var idi. Sadəcə bir neçə köməkçisi olan, dərindən xəstə və zəngin bir yırtıcı var idi”, – qəzet vurğulayıb.