Dünən İran dünya neft arteriyası kimi tanınan Hörmüz boğazını bağladığını bəyan edib.

Bizimesr.az xəbər verir ki, SEPAH-ın baş komandanının müşaviri generalı İbrahim Cəbbari bu barədə açıqlama yayıb.

O deyib ki, Hörmüz boğazından keçməyə çalışan hər hansı bir gəmini yandıracaqlar. “Neft boru kəmərlərinə hücum edəcəyik və bölgədən bir damla neftin belə çıxmasına imkan verməyəcəyik. Neftin qiyməti yaxın günlərdə 200 dollara çatacaq”.

Qeyd edək ki, hazırda dünya bazarında bu hadisədən dolayı ciddi dalğalanma müşahidə olunur. Dünən axşam saatlarında neftin qiyməti 79 dollardan 83 dollara yüksəlib.

Bəzi ekspertlər gərginlik davam edərsə, qiymətlərin 100 dolları keçəcəyini düşünürlər. Lakin bu rəqəmin 200 dollara qədər artacağı ciddi dairələr tərəfindən proqnozlaşdırılmır. Bildirək ki, Hörmüz boğazı Yaxın Şərq neft və qazının daşınmasında önəmli yer tutur. Dünya neft təlabatının 25 faizi bu boğaz vasitəsi ilə daşınır.