İsrailin Baş naziri Benyamin Netanyahu hərbi-siyasi kabinetin 6 may tarixində keçirilən iclasında İordan çayının qərb sahilindəki "A" və "B" zonalarında yeni yaşayış məskənlərinin salınmasına qəti etirazını bildirib. Baş nazir bu cür addımların İsrailin beynəlxalq nüfuzuna və iqtisadiyyatına ciddi zərbə vurduğunu vurğulayaraq, bu fəaliyyətlərə görə Avropa ölkələri tərəfindən tətbiq edilən sanksiyaların artdığını diqqətə çatdırıb. Netanyahu hökumət üzvlərinə müraciət edərək, "Biz yaşayış məskənlərini genişləndiririk, lakin buna "A" və "B" zonalarında nə ehtiyac var?" sualı ilə çıxış edib.

NOCOMMENT.az xəbər verir ki, iclas zamanı Mərkəzi Dairə komandanı Avi Blut Diaspor işləri üzrə nazir Amihay Şikli və deputat Limor Son Har-Melexin həmin ərazilərə səfərlərini əks etdirən fotoları təqdim edib. Komandan bildirib ki, bu cür yüksək rütbəli rəsmilərin həmin zonaları ziyarət etməsi qeyri-qanuni fəaliyyət göstərən gənclərə mənəvi dəstək vermək və onların hərəkətlərinə legitimlik qazandırmaq məqsədi daşıyır. Qeyd edək ki, 1995-ci ildə imzalanmış ikinci Oslo müqaviləsinə əsasən, İordan çayının qərb sahili inzibati və hərbi nəzarət baxımından üç əsas zonaya bölünüb.