“Yeni Müsavat” qəzetinin baş redaktoru Rauf Arifoğlu Müsavat Partiyasından çıxmaqla bağlı istefa ərizəsini partiya başqanına təqdim edib. Cumhuriyyet.az xəbər verir ki, bu barədə “Facebook”da Müsavat Partiyası başqanı Arif Hacılı yazıb.
Arif Hacılı bildirib ki, baş redaktor partiyadan ayrılmaqla bağlı ərizə ilə müraciət edib: “Son gəlişmələrlə bağlı yersiz müzakirələrə, bəzi siyasi alver meyllərinə son qoymaq üçün bildirirəm ki, Rauf Arifoğlu ötən həftə mənimlə görüşərək Müsavat Partiyasından çıxmaq barədə ərizəsini təqdim edib”.
“Yeni Müsavat” qəzetinin baş redaktoru Rauf Arifoğlu Arqument.Az-a açıqlamaında Arif Hacılının yazdıqlarını təsdiq edib və partiyadan ayrıldığını deyib: “Təsdiq edirəm. Arif bəy yazıb zatən. 15 iyuldan rəsmi olaraq Müsavat Partiyasının üzvü deyiləm”.
Onu da bildirək ki, ölkə rəhbərinin son sərəncamı ilə “Yeni Müsavat” qəzetinin baş redaktoruna əməkdar jurnalist adı verilib.