Dünyada ölümcül virusun yayılması barədə xəbər yayılıb. “Nipah” adlı virusun insanlara heyvanlardan (məsələn, yarasalar və ya donuzlar), çirklənmiş qidalardan keçə biləcəyi deyilir.
Bu virusun insandan insana da ötürülməsi mümkündür. Xəstəlik Hindistanda aşkar olunub. Qərbi Benqalda bu bəlanın qarşısını almaq üçün 100-ə qədər insan karantinə alınıb, 5 nəfər yoluxub və artıq ilk ölüm faktı qeydə alınıb.
“Nipah” virusu zoonotikdir, heyvanlar və insanlar arasında sürətlə yayılır. İnfeksiyaya qarşı hələki heç bir müalicə və peyvənd yoxdur.
Ümumdünya Səhiyyə Təşkilatının (ÜST) məlumatına görə, “Nipah” virusu epidemiya potensialına görə prioritet patogen kimi təsnif edilir.
ÜST-ün məlumatına görə insanlarda bu infeksiya asimptomatik infeksiyadan (subklinik) kəskin respirator infeksiyaya və ölümcül ensefalitə qədər müxtəlif klinik təzahürlərə səbəb olur.
Yüksək təhlükəli zoonotik infeksiya Cənubi Asiyada, Cənubi və Cənub-Şərqi Asiyada dəfələrlə ortaya çıxıb. Henipavirus cinsinin üzvü olan “Nipah” virusu əsasən Pteropus növünün meyvə yarasaları tərəfindən daşınır və çirklənmiş qida və ya birbaşa təmas yolu ilə insanlara yayılma riskini daim yaradır.
Təsdiq edilmiş peyvənd və ya spesifik antiviral müalicə mövcud olmadığı və keçmiş yayılmalarda ölüm nisbəti 40% ilə 75% arasında dəyişdiyi üçün Nipah harada yaranmasından asılı olmayaraq ciddi ictimai sağlamlıq təhlükəsi olaraq qalır. “Nipah” ilk dəfə 1999-cu ildə Malayziyada donuz fermerləri arasında baş verən yayılma zamanı aşkar edilib.
Sima Babayeva