Summativ qiymətləndirmənin keçirilməsi üçün şagirlərdən pul yığıldığı iddia olunur.

Bu iddiaya aid səs yazısını Sumqayıt şəhər Mikayıl Müşfiq adına 34 nömrəli məktəbin valideynləri “Xəzər Xəbər”in qaynar xəttinə göndəriblər.

Valideynlər iddia edirlər ki, məktəb rəhbərliyinin göstərişi ilə onlardan 5 manat summativ pulu tələb edilir. Pulu isə valideyn komitəsinin rəhbəri yığır.

Valideynlərin bəziləri bu ödənişləri verməyəcəklərini bildiriblər.

İddialarla bağlı adıçəkilən məktəbə yollandıq. Lakin məktəblilərin qış tətili olduğu üçün şagird və valideyn kollektivindən heç kəs yox idi.

İddialarla bağlı Abşeron-Xızı Regional Təhsil İdarəsindən isə “Xəzər Xəbər”ə bildirildi ki, məktəbin valideyn qrupuna aid olduğu iddia edilən səsyazısı ilə bağlı araşdırma aparılacaq. Araşdırmanın nəticəsi ilə bağlı ictimaiyyətə məlumat veriləcək.

Xezerxeber.az mövzu ilə bağlı daha ətraflı videomaterialı təqdim edir.