Bu gün Livanın cənub və şərq bölgələri İsrail ordusunun intensiv hava zərbələri, artilleriya atəşi və pilotsuz uçuş aparatlarının (PUA) hücumuna məruz qalıb. Livanın rəsmi dövlət mediasının yaydığı məlumata görə, hücum dalğası ölkənin geniş ərazilərini əhatə edib.

TEREF xəbər verir ki, Livanın Milli İnformasiya Agentliyi (NNA) ölkənin cənub-şərqindəki Mərcayun rayonunda yerləşən Qantara və Əl-Quseyr şəhərlərinin güclü atəşə tutulduğunu bildirib. Eyni zamanda, Yomor-əl-Şakif şəhərinə artilleriya zərbələrinin endirildiyi, Sur şəhərinin cənubundakı müxtəlif obyektlərin isə hava hücumları ilə hədəf alındığı qeyd olunub.

Hərbi hərəkətlilik təkcə zərbələrlə məhdudlaşmayıb; Livanın cənubundakı Zəhrani rayonu, həmçinin paytaxt Beyrutun cənub məhəllələri və ölkənin şimal-şərqindəki Baalbek şəhəri üzərində İsrailə məxsus kəşfiyyat dronlarının intensiv uçuşları qeydə alınıb.

Livan Səhiyyə Nazirliyinin son məlumatına görə, Yomor-əl-Şakif şəhərinə endirilən iki ardıcıl aviayerləşmə nəticəsində azı dörd nəfər həyatını itirib. Bölgədə gərginliyin daha da artacağı və hərbi əməliyyatların miqyasının genişlənəcəyi ehtimal olunur.NOCOMMENT.az