Çində lityumun qiymətləri yüksəlir. Buna akkumulyator batareyalarına olan tələbin artacağına dair inam səbəb olub.

"Bloomberg" xəbər verir ki, enerji saxlama sistemlərinə (ESS) tələbat həm Çinin daxili siyasəti, həm də süni intellekt üçün məlumat emalı mərkəzlərindən gələn artan enerji tələbi fonunda dünya üzrə yüksəlir.

Quanqcou fyuçers birjasında lityum karbonat üzrə ən aktiv müqavilə ardıcıl beş sessiya ərzində bahalaşıb. Çində spot bazarda qiymətlər iki ayın maksimumuna çatıb, baxmayaraq ki, hələ də 2022-ci ilin zirvəsindən təxminən 85 faiz aşağıdır.

Akkumulyatorlar bu gün Çinin sənaye artımı strategiyasında günəş enerjisi və elektromobillərlə yanaşı əsas istiqamətlərdən birinə çevrilib.

Hökumət 2027-ci ilə qədər enerji saxlama gücünü 180 giqavata çatdırmağı planlaşdırır ki, bu da külək və günəş enerjisinin fasiləli axınlarını enerji sisteminə inteqrasiya etməyə kömək edəcək. Bu plan akkumulyatorların əsas komponentlərindən biri olan lityuma tələbi kəskin artırır.

Bundan başqa, Cənubi Koreyanın "Samsung SDI Co." şirkəti ABŞ-da ESS istehsalını artırmaq üçün elektromobil akkumulyator istehsal xətlərinin bir hissəsini yenidən yönəldib. Avstraliyanın mədən şirkəti "PLS Ltd." ötən həftə bildirib ki, bu sektor sürətlə böyüyür.

"BloombergNEF"in məlumatına görə, qlobal enerji saxlama gücü 2035-ci ilə qədər hər il yeni rekordlar müəyyən edəcək və bu prosesdə Çin və ABŞ-ın bazar mövqeləri daha da möhkəmlənəcək.

"Adamas Intelligence" konsaltinq şirkətinin analitiki Kris Vilyamsın sözlərinə görə, bu il elektromobil akkumulyatorlarına tələbat 20 faiz, enerji saxlama sistemlərinə tələbat isə 50 faiz artacaq.