Bakıya gələn bəzi xarici ulduzların buradakı auditoriyanı necə "ucuz" və "asan" gördüklərinin növbəti şahidi olduq.
İllərin "balaca Emrah"ı, böyük sənətçi statusu iddiasında olan Emrah Erdoğan, Bakı sərnişinləri ilə birgə təyyarədən düşdüyü idman geyimində (idman kostyumunda) birbaşa səhnəyə addımladı.
Nə bir qarderob dəyişikliyi, nə tamaşaçıya vizual hörmət, nə də sənətçi adına yaraşan bir məsuliyyət.
​Konsert biletinə pul ödəyən, günlər öncə həyəcanla gözləyən və o gecə üçün ən gözəl libaslarını geyinib gələn Bakı auditoriyası, qarşısında divanında uzanıb TV izləyirmiş kimi rahat görünən bir müğənni tapdı.
Səhnə – müqəddəs bir məkandır. Ora çıxarkən geyilən geyim təkcə müğənninin zövqünü deyil, onun qarşısındakı kütləyə verdiyi dəyəri göstərir. Emrahın bu addımı isə sadəcə bir mesaj verir: "
Mən gəldim, oxudum, pulumu alıb gedirəm, necə göründüyümün bir önəmi varmı?"
​"Zamanım yox idi", "Təyyarə gecikdi" kimi bəhanələr belə bir peşəkar üçün keçərli deyil. Logistikanı və zamanı düzgün idarə etmək elə peşəkarlığın yarısıdır.
Əgər bir sənətçi yarım saat vaxt tapıb üstünü dəyişə bilmirsə, deməli, o, Bakı konsertinə sadəcə "yolüstü bir qazanc yeri" kimi baxıb.
​ İdman geyimində səhnəyə çıxmaq "səmimiyyət" və ya "rahatlıq" deyil. Bu, açıq-aşkar tənbəllik və öz pərəstişkarlarını heçə saymaqdır.
Azərbaycan tamaşaçısı illərdir sevdiyi sənətçidən belə bir laqeydlik yox, səhnəyə və sənətə yaraşan ehtiram görməyə layiq idi.
Ümid edirik ki, təşkilatçılar və digər gələn qonaqlar bu biabırçılıqdan pay çıxaracaqlar: Bakı səhnəsi kiminsə qaçhaqaçda idman etdiyi meydança deyil!
Sima Babayeva