Qanunsuz mərc araşdırması çərçivəsində barəsində qırmızı bülleten çıxarılmış keçmiş futbolçu Batuhan Karadenizlə bağlı yeni iddialar gündəmə gəlib.

Referans Media xəbər verir ki, Karadenizin Birləşmiş Ərəb Əmirliklərində saxlanıldığı iddia olunur. Sosial şəbəkələrdə geniş yayılan xəbərlərə əsasən, onun beynəlxalq axtarışda olduğu və bu çərçivədə yerli hüquq-mühafizə orqanları tərəfindən saxlanıldığı bildirilib.

Qeyd olunur ki, Batuhan Karadeniz barəsində daha əvvəl İstanbul Baş Prokurorluğu tərəfindən “qanunsuz qumar oyunlarının təşviqi” ittihamı ilə istintaq başlanmış, onunla yanaşı bir sıra tanınmış şəxslərin də adı bu işdə hallanmışdı.

İddialara görə, futbolçunun aktivlərinə da əvvəlcədən həbs qoyulub və o, bir müddətdir ölkə xaricində yaşayırdı. Hazırda isə onun Türkiyəyə ekstradisiya edilə biləcəyi ehtimalı müzakirə olunur.

Bununla belə, rəsmi qurumlardan hələlik mövzu ilə bağlı təsdiqləyici açıqlama verilməyib. Hadisənin detalları araşdırılır.