“Nvidia” şirkətinin baş direktoru Censen Huan, ABŞ-la Çin arasında yeni ticarət razılaşmasından sonra “Blackwell” çiplərinin Çində satılacağına ümid etdiyini bildirib.

Valyuta.az xəbər verir ki, onun sözlərinə görə, bu məsələ ilə bağlı yekun qərar ABŞ Prezidenti Donald Tramp tərəfindən veriləcək.

“Biz daim Çinə qayıtmağa ümid edirik və düşünürəm ki, 'Nvidia'nın Çində fəaliyyəti çox uğurludur. Bu, həm ABŞ-ın, həm də Çinin maraqlarına uyğundur”, - deyə Huan vurğulayıb.

Bu açıqlama ABŞ və Çin arasında ticarət razılaşmasının qüvvəyə mindiyi bir vaxtda səsləndirilib. Çin lideri Si Cinpin Tramp ilə görüşündən sonra ilk dəfə ictimaiyyət qarşısında çıxış edərək “təchizat zəncirlərini qırmaqdan” çəkinməyə çağırıb.

“Biz ayrılmaq əvəzinə birgə hərəkət etməyə, təchizat zəncirlərini qırmaq əvəzinə onları genişləndirməyə sadiq qalmalıyıq”, - deyə Si Cinpin bildirib.

ABŞ və Çin arasında əldə olunmuş razılaşma aylardır davam edən qeyri-müəyyənlik və gərginlikdən sonra iki ölkə arasında ticarət müharibəsini müvəqqəti olaraq dayandırmış hesab olunur.

Razılaşmanın əsas müddəaları:

ABŞ, fentanil istehsalı ilə bağlı mallara tətbiq olunan tarifləri 20 faizdən 10 faizə endirəcək. Əvəzində Çin bu maddənin yayılmasının qarşısını almaq üçün ciddi tədbirlər görəcəyini öhdəsinə götürüb. Bu dəyişiklik ümumi tariflərin 57 faizdən 47 faizə enməsi ilə nəticələnəcək.

Çin nadir torpaq elementlərinin ixracına qoyduğu məhdudiyyətləri aradan qaldıracaq.

ABŞ, Pekin və “Nvidia” rəhbərliyi arasında məhdudlaşdırılmış çiplərin istifadəsi ilə bağlı vasitəçilik edəcək.

Trampın sözlərinə görə, Çin ABŞ-dan daha çox enerji, o cümlədən Alyaska nefti və qazı alacaq.

Çin “çox böyük həcmdə” ABŞ-dan soya fasulyəsi idxalına dərhal başlayacaq.

Razılaşma Trampın prezidentlik müddətinə yenidən başlamasından sonra Çinə qarşı iqtisadi təzyiqləri artırdığı bir dövrdə əldə olunub və iki ölkə arasında münasibətlərdə dönüş nöqtəsi kimi qiymətləndirilir.