“Ukrayna Rusiya ilə münaqişədən qalib çıxmayacaq; yalnız atəşkəs və sülh razılaşması onu xilas edəcək”.

Bu barədə Macarıstanın Baş naziri Viktor Orban Avropa Komissiyasının sədri Ursula fon der Leyenə yazdığı məktubda bildirib.

Budapeştdən Brüsselə göndərilən mesajda beş əsas məqam var. Baş nazirin siyasi müşaviri və adaşı Balazs Orban onları “Facebook”da paylaşıb.

“Ukrayna bu müharibədə döyüş meydanında qalib gələ bilməz. Ukraynanın iztirabları ancaq sürətli atəşkəs və yaxud sülh sazişi ilə məhdudlaşdırıla bilər. Avropa İttifaqı (Aİ) müharibədən sonrakı nizamlanmaya dair danışıqlara dərhal başlamalıdır. Macarıstan Aİ-nin Ukraynaya əlavə maliyyə yardımını dəstəkləmir”, – Balazs Baş nazirin məktubundan sitat gətirib.

Onun sözlərinə görə, Orban həmçinin Avropa Komissiyasının prezidentinə deyib ki, onun Ukraynanın maliyyələşdirilməsi ilə bağlı təkliflərində “nə artıq xərclənmiş vəsaitlərə nəzarət, nə də gələcək ödənişlər üçün daha sərt şərtlər var”.