ABŞ Dövlət Departamenti ölkədəki Amerika vətəndaşlarına müraciət edərək onları təcili şəkildə İranı tərk etməyə çağırıb. Rəsmi açıqlamada vətəndaşlara yerli medianı diqqətlə izləmək, uçuş cədvəllərini kommersiya aviaşirkətləri vasitəsilə mütəmadi dəqiqləşdirmək tövsiyə olunur. Regionda artan gərginlik fonunda bu xəbərdarlıq ABŞ-ın təhlükəsizlik tədbirlərini ən yüksək səviyyəyə qaldırdığını göstərir.

NOCOMMENT.az xəbər verir ki, İranı tərk etmək istəyən şəxslər üçün quru yolu ilə Ermənistan, Azərbaycan, Türkiyə və Türkmənistana keçid imkanları qeyd olunub. Bununla yanaşı, ABŞ vətəndaşlarına Əfqanıstan, İraq, habelə Pakistan və İranın sərhəd zonalarına səfər etməkdən qətiyyətlə çəkinmək tapşırılıb. Dövlət Departamenti bu ərazilərdə risklərin maksimum həddə olduğunu vurğulayıb.

Açıqlamada həmçinin xəbərdarlıq edilir ki, İran hakimiyyəti ABŞ vətəndaşlarının ölkədən çıxışına süni maneələr yarada və ya əlavə rüsumlar tələb edə bilər. İkili vətəndaşlığı olan şəxslərin isə ölkədən yalnız İran pasportu ilə çıxa biləcəyi xüsusi olaraq qeyd edilib. Hazırda ABŞ-ın İranda diplomatik nümayəndəliyi olmadığı üçün vətəndaşlara fövqəladə hallarda ekstremal diqqətli olmaları tövsiyə edilir.