Türkiyənin tanınmış siması, milyonların sevimli aktyoru Oktay Kaynarcanın qida zəhərlənməsi səbəbindən xəstəxanaya yerləşdirildiyi məlum olub.

Demokrat.az xəbər verir ki, aktyor səhər saatlarında tibb müəssisəsinə müraciət edərək müalicə altına alınıb. Həkimlərin müdaxiləsindən sonra sənətçinin vəziyyətinin stabilləşdiyi və özünü yaxşı hiss etdiyi bildirilir.

Hazırda "Kim milyoner olmaq istəyir?" verilişinin aparıcısı olan Kaynarca uzun illərdir kino və televiziya dünyasının ən parlaq ulduzlarından biri sayılır. Xüsusilə "Kurtlar Vadisi" serialındakı Süleyman Çakır obrazı ilə yaddaşlara həkk olunan aktyor "Adanalı", "Eşkıya Dünyaya Hükümdar Olmaz" və "Ben Bu Cihana Sığmazam" kimi reytinqli layihələrin baş qəhrəmanı olub.

Qeyd edək ki, onun ekran karyerası hələ 1989-cu ildə "Gençler" serialı ilə başlayıb.