"Matter Neuroscience" şirkəti 3 kq ağırlığında telefon örtüyü buraxıb.

Androidauthority.com xəbər verir ki, şirkət bu qeyri-adi aksesuar vasitəsilə insanları smartfon asılılığından və sosial şəbəkələrdə xeyli vaxt keçirməkdən xilas etməyi planlaşdırır.

Örtük paslanmayan poladdan hazırlanıb. İstehsalçılar iddia edirlər ki, ağır smartfonu daim tutmaqdan yaranan fiziki yorğunluq "bədən və ağlın əks əlaqəsi"ni formalaşdırır. Eyni zamanda, örtük asanlıqla çıxarıla bilməz, çünki dörd vintlə bərkidilib.

Aksesuarın forması qəsdən əlverişsiz hazırlanıb, buna görə də smartfon cibə yerləşmir, lakin telefonun bütün funksionallığını tam saxlayır. Örtük "iPhone 13"dən başlayaraq bir neçə "iPhone" modelinə uyğun gəlir.

Qiyməti 209 dollardır.