Xaricə köç etməyi planlaşdıranlar üçün dünyanın ən arzuolunan ölkələrinin siyahısı açıqlanıb.

Bu barədə “Daily Mail” yazıb.

“1st Move International” şirkətinin mütəxəssisləri “Google”un qlobal axtarış məlumatlarını təhlil edərək, köç etmək üçün ən çox maraq doğuran istiqamətləri müəyyənləşdiriblər.

Tədqiqat nəticələrinə görə, Kanada 2025-ci ildə 269 220 “köç etmək” sorğusu ilə birinci yeri tutub. Ölkə bu göstərici ilə tədqiqatda yer alan digər 74 istiqaməti geridə qoyub. Kanada ikinci ildir ki, lider mövqeyini qoruyur və nəfəskəsici təbiəti, eləcə də yüksək həyat keyfiyyəti ilə insanları cəlb etməyə davam edir.

Avstraliya 207 900 axtarış sorğusu ilə ikinci yeri tutub — bu ölkə gözəl çimərlikləri və sakit həyat tərzi ilə köç etmək istəyənlərin diqqətini çəkib.

Üçüncü yerdə isə 179 400 sorğu ilə “Smaragd adası” adlandırılan İrlandiya qərarlaşıb.

Yeni Zelandiya 177 700 sorğu ilə dördüncü, Yaponiya isə 172 880 axtarışla beşinci yerdədir.

İlk onluqda daha sonra Portuqaliya, Kosta-Rika, İspaniya, Niderland və Tayland yer alıb.

Araşdırma göstərib ki, Böyük Britaniya sakinləri arasında ən çox köç etmək istənilən ölkə Amerika Birləşmiş Ştatlarıdır. Daha sonra Birləşmiş Ərəb Əmirlikləri və Avstraliya gəlir. Britaniyalılar arasında ən populyar şəhər Nyu-Yorkdur, son iki ildə bu şəhərə köçlə bağlı ən çox sorğu məhz ora yönəlib. Los-Anceles və Mayami də britaniyalılar arasında məşhur istiqamətlər sırasındadır.

“1st Move International”ın icraçı direktoru Mayk Xarvi bildirib ki, 2026-cı il üçün köç tendensiyaları böyük dəyişiklik vəd etmir:

“ABŞ, Birləşmiş Ərəb Əmirlikləri və Avstraliya kimi ölkələr hələ də britaniyalılar üçün əsas istiqamətlər olaraq qalır. Kanada da əvvəlki kimi yüksək göstəricilərini qoruyur və bu baxımdan yavaşlama əlamətləri göstərmir".

Ekspertin sözlərinə görə, son illərdə Kipr və Yeni Zelandiya kimi müasir, lakin sakit həyat tərzinə yönəlmiş kiçik ölkələrin populyarlığı artmaqdadır:

“Bu ölkələr daha ölçülü həyat tempi təklif edir, amma imkanlardan imtina etmədən – bu da son illərdə köç qərarlarında əsas amillərdən birinə çevrilib".