Lüks qatar səyahətləri son illərdə dünyanın ən sürətlə populyarlaşan turizm istiqamətlərindən birinə çevrilib. Xüsusilə gənc nəsil arasında bu növ səyahətlərə maraq artıb. Son araşdırmalara görə, Y və Z nəsillərinin 45 faizi qeyri-ənənəvi istirahət variantları arasında ilk seçim kimi məhz lüks dəmir yolu səyahətlərini üstün tutur.

Valyuta.az xəbər verir ki, artan maraq bazarda yeni layihələrin meydana çıxmasına səbəb olub. Böyük Britaniyada "Britannic Explorer" ölkənin ilk lüks gecə qatar marşrutunu istifadəyə verib, İtaliyada "La Dolce Vita Orient Express" fəaliyyətini genişləndirib, Səudiyyə Ərəbistanında isə "Dream of the Desert" layihəsinin ilin sonuna qədər istifadəyə verilməsi planlaşdırılır.

Bununla belə, varlı turistlərin diqqəti artıq daha fərqli və əlçatmaz marşrutlara yönəlir. Mütəxəssislərin fikrincə, sosial şəbəkələrdə məşhurlaşan qatarlardan fərqli olaraq, ən çox maraq doğuran səyahətlər məhdud sayda sərnişin qəbul edən, bəzən yalnız lotereya yolu ilə rezervasiya edilən və geniş ictimaiyyətə demək olar ki, məlum olmayan marşrutlardır.

Turizm sahəsində fəaliyyət göstərən "ASMALLWORLD" şirkətinin baş direktoru Zeyn Riçardson bildirib ki, təcrübəli səyahətçilər artıq hər kəsin tanıdığı marşrutlardan daha çox, dostlarının belə eşitmədiyi eksklüziv təcrübələr axtarırlar. Onun sözlərinə görə, bəzi qatarlara qəbul olmaq üçün müraciət edən hər 76 nəfərdən yalnız biri şans qazanır.

Yaponiyada dörd illik gözləmə siyahısı

Dünyanın ən eksklüziv qatarlarından biri Yaponiyanın "Train Suite Shiki-shima" layihəsidir. Bu qatar üçün biletlər adi qaydada satılmır, sərnişinlər lotereya sistemi vasitəsilə seçilir. Qatar istifadəyə veriləndən bəri tələbat təklifdən 76 dəfə çox olub və bəzi şəxslər dörd il ardıcıl müraciət etdikdən sonra səyahət hüququ əldə edə biliblər.

Məşhur dizayner Ken Okuyama tərəfindən hazırlanmış qatar cəmi 34 sərnişin qəbul edir. Qatarın ən bahalı nömrələrində şəxsi hamam və xüsusi istirahət zonaları mövcuddur. Ən yüksək kateqoriyalı biletlərin qiyməti 10 min dollara qədər yüksəlir.

Vyetnam sahillərində elit səyahət

Vyetnamda fəaliyyət göstərən "The Vietage" isə dünyanın ən kiçik lüks qatar xidmətlərindən biri hesab olunur. Qatarın hər vaqonunda cəmi 12 sərnişin qəbul edilir. Marşrut Dananq, Quy Non və Nya Çanq şəhərlərini birləşdirir. Sərnişinlərə fransız və vyetnam mətbəxindən ibarət xüsusi menyu, limitsiz içkilər və masaj xidmətləri təqdim olunur. Bir istiqamət üzrə biletlərin qiyməti 420 dollardan başlayır.

Afrikanın gizli dəmir yolu macərası

Cənubi Afrikanın məşhur "Rovos Rail" şirkətinin ildə cəmi bir və ya iki dəfə təşkil etdiyi "Copper Trail" marşrutu da dünyanın ən nadir qatar səyahətlərindən biri hesab edilir. 15 günlük səyahət Anqola, Zambiya və Konqo Demokratik Respublikasından keçərək Atlantik okeanını Hind okeanı ilə birləşdirir.

Qatarın kral nömrələrində şəxsi salonlar və Viktoriya dövrünü xatırladan vannalar yerləşir. Bu marşrutun qiyməti bir nəfər üçün 28 600 dollardan başlayır. Çox vaxt bütün qatar bir ailə və ya özəl klub tərəfindən əvvəlcədən rezervasiya edilir.

Avropadan Kapadokiyaya 14 günlük səyahət

"Golden Eagle Luxury Trains" şirkətinin təşkil etdiyi "Aurelian Odyssey" marşrutu Parisdən başlayaraq Kapadokiyaya qədər uzanır. Qatar yeddi ölkədən keçərək Balkanlar və Türkiyənin az tanınan bölgələrini əhatə edir. Sərnişinlərə Sloveniyadakı Postoyna mağarasında xüsusi qatar gəzintisi və Bosfor boğazında günəşin doğuşunu izləmə imkanı təqdim olunur.

Ən yüksək səviyyəli nömrələrin qiyməti təxminən 30 min dollardan başlayır.

Avstraliyada şəxsi eşikağası olan qatar

Avstraliyanın məşhur "The Ghan" qatarında bu il istifadəyə verilən "Australis Suite" isə yeni səviyyəli lüks anlayışı təqdim edir. Standart nömrələrdən üç dəfə böyük olan bu bölmələrdə mərmər hamamlar, xüsusi bar və 24 saat xidmət göstərən şəxsi eşikağası mövcuddur.

Sərnişinlər üçün helikopter turları, səhrada özəl şam yeməkləri və fərdi ekskursiyalar təşkil edilir. Darvin-Adelaida marşrutu üzrə üç günlük səyahətin qiyməti 8 600 dollardan başlayır.

Mütəxəssislərin fikrincə, son illərdə eksklüziv turizm bazarında əsas tendensiya artıq təkcə dəbdəbə deyil, həm də əlçatmazlıq və unikallıq amili ilə müəyyənləşir. Buna görə də dünyanın ən varlı səyahətçiləri daha çox məhdud sayda insanın istifadə edə bildiyi xüsusi qatar marşrutlarına üstünlük verməyə başlayıblar.