Çində bəzi “McDonald’s” filiallarında müştərilərin velosiped pedalı çevirərək telefonu enerji ilə doldurduğu xüsusi masalar diqqət çəkir.

Sistemə əsasən, müştərilər yemək yeyərkən masaya inteqrasiya edilmiş velosipedin pedallarını çevirirlər. Bunun nəticəsində yaranan elektrik enerjisi USB çıxışı vasitəsilə telefonu enerji ilə doldurmaqda istifadə olunur.

Məlumata görə, bu tətbiq əvvəlcə bəzi filiallarda sınaq məqsədilə quraşdırılıb. Daha sonra sosial şəbəkələrdə yayılan görüntülər istifadəçilərin diqqətini cəlb edib.

Bəzi istifadəçilər ideyanı “fast-food və idmanın maraqlı birləşməsi” kimi qiymətləndirib. Digərləri isə tətbiqin praktik əhəmiyyətinin az olduğunu və daha çox diqqət cəlb etmək məqsədi daşıdığını düşünür.

Layihənin əsas məqsədinin yalnız telefonları şarj etmək deyil, müştərilərə enerji istehsalını praktiki şəkildə göstərmək və ekoloji maarifləndirməyə diqqət çəkmək olduğu bildirilir.

Qeyd edək ki, bu cür interaktiv həllərin restoran sektorunda müştəri təcrübəsinin dəyişməsinə təsir edə biləcəyi və gələcəkdə restoranların yalnız qida deyil, fərqli təcrübələr də təqdim etməsinin mümkün olduğu qeyd olunur.