Çinin cənub-qərbində yerləşən Çunçinq qeyri-adi şəhər planı ilə dünya miqyasında diqqət çəkir. Sosial mediada yayılan videolar sayəsində tanınan bu meqapolis “8D şəhər” kimi adlandırılır.

Sfera.az bildirir ki, Çunçinq dik yamaclar və dərin vadilər üzərində qurulub. Burada göydələnlər təkcə yuxarıya deyil, eyni zamanda aşağıya doğru da uzanır. Küçələr və yollar müxtəlif hündürlüklərdə kəsişir, eyni binaya fərqli mərtəbələrdən daxil olmaq mümkündür.

Şəhərdə “birinci mərtəbə” anlayışı dəyişkəndir – daxil olduğunuz küçədən asılı olaraq eyni ünvan 1-ci, 5-ci və ya 12-ci mərtəbə ola bilər. Xəritə tətbiqləri belə tez-tez çaşır, çatdırılma nöqtələri üfüqi olaraq yaxın görünsə də, əslində onlarla metr fərq ola bilir.

Metro xətlərinin binaların içərisindən keçməsi, körpülər və liftlərlə birləşdirilən yollar Çunçinqin şaquli həyat tərzini tamamlayır. Mütəxəssislərə görə, bu mürəkkəb quruluş plansızlıqdan deyil, şəhərin coğrafi şərtlərindən irəli gəlir.

Çunçinq bu gün şəhərsalmanın ən ekstremal şaquli nümunələrindən biri hesab olunur.