11 mərkəzi bankın və digər oxşar maliyyə institutlarının rəhbərləri ABŞ-nin Federal Ehtiyatlar Sisteminin (FED) sədri Cerom Pauellə dəstək ifadə edən bəyanat yayıblar. Bəyanat ABŞ prezidenti Donald Trampın cənab Pauellə göstərdiyi təzyiqlərlə əlaqədar dərc edilib.
Məktuba, o cümlədən Avropa Mərkəzi Bankının rəhbəri Kristin Laqard, İngiltərə Bankının rəhbəri Endryu Beyli, Beynəlxalq Hesablaşmalar Bankının rəhbərləri, həmçinin Fransa, Kanada, Braziliya, Cənubi Koreya və digər ölkələrin mərkəzi bank rəhbərləri imza atıblar. Onlar Federal Ehtiyat Sistemi və onun sədri Cerom Pauellə tam həmrəylik ifadə edərək bildiriblər ki, “mərkəzi bankların müstəqilliyi xidmət etdiyimiz vətəndaşların maraqları naminə qiymət, maliyyə və iqtisadi sabitliyin təməl daşıdır”.

Cerom Pauell və Donald Tramp arasında münaqişə Trampın prezident vəzifəsinə başladıqdan qısa müddət sonra yaranıb. Tramp dəfələrlə FED rəhbərini, ilk növbədə əsas faiz dərəcəsini əhəmiyyətli dərəcədə azaltmaq istəmədiyinə görə tənqid edib. KİV-lər ötən il ərzində Trampın FED sədrini dəyişmək planları barədə yazıblar.

Bir neçə gün əvvəl məlum olub ki, ABŞ-nin Ədliyyə Nazirliyi cənab Pauell və tənzimləyicinin digər əməkdaşları barəsində araşdırmaya başlayıb. Araşdırmanın formal mərkəzində FED binasının təmiri dayanır — prezident Tramp və onun tərəfdarları dəfələrlə xərclərin şişirdildiyini və işlərin uzadıldığını iddia ediblər. Cənab Pauellin özü və maliyyə sektorunun bir çox nümayəndələri, o cümlədən FED-in keçmiş rəhbərləri hesab edirlər ki, bu, tənzimləyiciyə təzyiq göstərmək üçün bəhanə kimi istifadə olunur.