Ukrayna Prezidenti Volodimir Zelenski Rusiyanın Xarkov vilayətinin Kupyansk şəhərini ələ keçirdiyinə dair bəyanatını təkzib edib. Zelenskinin sözlərinə görə, Ukrayna Silahlı Qüvvələri şəhəri tam təmizləyib.

Bu barədə o, Fransanın Prezidenti Emmanuel Makronla birgə keçirdiyi mətbuat konfransında danışıb.

Zelenski həmçinin ABŞ Prezidenti Co Baydenin təşəbbüsü ilə başlanan Rusiya ilə danışıqlara da toxunub. Onun sözlərinə görə, ən çətin mövzu ərazi məsələsi olub:

“Sadəcə bu məsələ altı saat müzakirə olundu. İndi sülh planı əvvəlkindən daha yaxşı görünür”.

Fransa Prezidenti Emmanuel Makron isə bəyan edib ki, “İstəkli dövlətlər koalisiyası” Ukrayna üçün təhlükəsizlik təminatları paketi hazırlayıb:

“Qeyd etdiyim kimi, biz Avropanın, Fransanın və Ukraynanın təhlükəsizliyi üçün mühüm olan zəmanətlər üzərində aparılan işi başa çatdırmışıq. Yaxın günlərdə ‘İstəkli koalisiya’ arasında bu zəmanətlərdə Amerikanın rolunu dəqiqləşdirmək üçün vacib danışıqlar aparılacaq”.

Makron əlavə edib ki, Rusiya bir neçə dəfə atəşkəs çağırışlarını rədd edib:

“Biz ilk dəfə bu ilin martında atəşkəs çağırışı etdik, Zelenski razılaşdı, Rusiya isə ‘yox’ dedi. İyunda yenidən təklif etdik, üzərində işlədik, Rusiya yenə rədd etdi. Daha sonra ABŞ-ın Ankoricdə vasitəçilik təklifi oldu, Rusiya yenə ‘yox’ dedi. İndi Amerika yeni təkliflə çıxış edir, cavab üçün Rusiyanı gözləməliyik”, – Makron vurğulayıb.//globalinfo.az