Finlandiya hakimiyyət orqanları Finlandiya körfəzində iki sualtı kabelin zədələndiyi barədə məlumat daxil olduqdan sonra bir yük gəmisini saxlayıb. Məlumata görə, zədələr ötən gecə iki telekommunikasiya şirkəti tərəfindən aşkar edilib. Kabellər Estoniyanın paytaxtı Tallinni Helsinki ilə birləşdirir. Finlandiya polisinin bildirdiyinə görə, araşdırma zamanı müəyyən olunub ki, gəmi hərəkətdə olduğu vaxt lövbər dənizin dibinə salınıb. Rəsmi məlumatlara əsasən, yük gəmisi Sankt-Peterburqdan İsrailə doğru hərəkət edirmiş və Sent-Vinsent və Qrenadinlər bayrağı altında üzür. Helsinki polisi ağır sabotaj şübhəsi ilə istintaqa başlayıb. Estoniyanın hökumət başçısı Mixal televiziyada bildirib ki, ilkin nəticələrə görə söhbət Rusiyanın “kölgə donanmasına” aid bir gəmidən getmir. Məlumata əsasən, 14 nəfərlik ekipaj Rusiyadan və Rusiyanın qonşu ölkələrindən olan şəxslərdən ibarətdir.
Sarvan Səmədoğlu
TEREF