Moskva şəhərində müşahidə olunan intensiv leysan yağışları metropolun həyat ritmini demək olar ki, tamamilə dayandırıb. Paytaxtın küçə və prospektləri su altında qalıb, nəqliyyatın hərəkətində ciddi problemlər yaranıb.

NOCOMMENT.az xəbər verir ki, şəhərin bir çox rayonlarında drenaj sistemləri yağan hədsiz miqdarda suyu ötürməkdə çətinlik çəkir. Nəticədə avtomobil yollarında, tunellərdə və hətta bəzi yaşayış məntəqələrinin girişlərində göllənmələr əmələ gəlib, bir çox avtomobil suyun ortasında qalaraq nasaz vəziyyətə düşüb. İctimai nəqliyyatın, xüsusilə də avtobus və tramvayların hərəkət qrafikində böyük ləngimələr qeydə alınıb.

Mütəxəssislər və kommunal xidmətlər fövqəladə rejimdə işləsə də, yağışın davamlı olması vəziyyəti daha da çətinləşdirir. Paytaxtın təcili xidmətlərinə küçələrdə köməksiz qalan sürücülərdən və evlərinin zirzəmilərini su basan vətəndaşlardan yüzlərlə müraciət daxil olub. Şəhər hakimiyyəti sakinləri mümkün qədər evdən çıxmamağa və şəxsi avtomobillərindən istifadəni məhdudlaşdırmağa çağırıb.