Myanmanın şimalında sənaye təyinatlı emulsiyalı partlayıcı maddələrin saxlanıldığı anbarda baş verən partlayış nəticəsində azı 20 nəfər həlak olub, onlarla insan yaralanıb.

NOCOMMENT.az xəbər verir ki, bu barədə "Eleven Media Group" məlumat yayıb.

Hadisə Şan milli bölgəsinin şimalında qeydə alınıb. Həmin ərazi etnik silahlı qruplaşma olan "Taanq Milli Azadlıq Ordusu"nun nəzarəti altındadır.

Qruplaşmanın məlumatına görə, anbarda saxlanılan partlayıcı maddələr dağ-mədən sənayesində istifadə üçün nəzərdə tutulubmuş.

Partlayışın başvermə səbəbi hələlik müəyyən edilməyib.