Avropa İttifaqının ABŞ-ın Qrenlandiya üzərində nəzarəti ələ keçirməyə yönəlmiş mümkün addımları qarşısında hərəkət planı yoxdur.

Globalinfo.az xəbər verir ki, bu barədə Financial Times qəzeti məlumat yayıb.

Nəşrin yazdığına görə, Aİ ölkələrinin Qrenlandiyaya təzyiq göstərərək Danimarkadan ayrılmağa təşviq olunmasının qarşısını almaq üçün heç bir strategiyası yoxdur. Brüsseldə bu ssenarilər daha real hesab edilir. Bildirilir ki, ABŞ prezidenti Donald Tramp bu məsələdə üstün mövqeyə malikdir və daha sərt zərbələr vurmaq və ya ciddi təhdidlər səsləndirmək imkanına sahibdir.

Avropa siyasi dairələrində ABŞ-ın hərbi bazalarının bağlanması və ya ABŞ xəzinədarlıq istiqrazlarının alınmasına qadağa qoyulması kimi cavab tədbirləri müzakirə olunsa da, Aİ-nin bu addımlara real olaraq gedəcəyi inandırıcı görünmür. Bunun əvəzinə Avropa liderləri Ukrayna məsələsində Vaşinqtonun dəstəyini qorumaq məqsədilə Trampa qarşı “strateji təzyiq” tətbiq etməyə üstünlük verirlər.

Donald Tramp dəfələrlə Qrenlandiyanın ABŞ-a birləşdirilməsinin vacibliyini vurğulayıb. O, hələ birinci prezidentliyi dövründə adanı satın almaq ideyasını irəli sürüb. 2025-ci ilin martında isə Qrenlandiyanın ilhaq ediləcəyinə əmin olduğunu bildirib. Ağ Evin aparat rəhbərinin müavini Stiven Miller də Danimarkanın Qrenlandiya üzərindəki hüququnu şübhə altına alaraq, adanın ABŞ-ın tərkibinə daxil edilməli olduğunu deyib.