Cinayətkarlar Londondakı zərgərlik mağazalarına tunel qazaraq 700 000 funt-sterlinqdən (955 min dollar) çox dəyərində qızıl-zinət əşyaları oğurlayıblar.

TASS-ın verdiyi məlumata görə, bu barədə London polisi açıqlama verib.

Bildirilir ki, cinayətdə şübhəli bilinən üç nəfər iyulun 17-də saxlanılıb. Onlardan ikisi - Laurentsiu-Daniel Nitisuara və İoan Asafeti Londonun cənubundakı Tutinq ərazisində, birbaşa hadisə yerində tutulublar. Üçüncü şəxs olan Serjiu Plastin isə İrlandiyaya qaçmağa cəhd edərkən Londonun Stansted hava limanında ələ keçirilib.

Avqustun 21-də Kinqston şəhərinin Kral Məhkəməsində keçirilən iclasda hər üç şəxs öz günahını etiraf edib. Vurğulanır ki, həmin şəxslər may ayından iyuladək Londonda silsilə qarətlər həyata keçiriblər.

Qeyd olunur ki, cinayətkarlar təhlükəsizlik sistemlərindən yan keçmək və gecə saatlarında obyektlərə daxil olmaq üçün əsasən zərgərlik mağazalarını hədəf seçərək tunel qazma üsulundan istifadə ediblər.