Mətbəxdə hər gün istifadə etdiyimiz bəzi əşyalar düzgün qulluq edilmədikdə sağlamlıq üçün risk yarada bilər. Xüsusilə bakteriyaların toplana bildiyi süngərlər, zədələnmiş yapışmayan örtüklü tavalar və köhnəlmiş plastik kəsmə taxtaları diqqət tələb edir.

Moderator.az xəbər verir ki, bu barədə Instagram-da “mariya_prohealth” səhifəsi paylaşım edib.

Həmin əşyalar aşağıdakılardır:

Mətbəx süngəri

Qab yumaq üçün istifadə olunan süngərlər nəmli qalır və üzərində qida qalıqları toplana bilir. Bu isə bakteriyaların çoxalması üçün əlverişli şərait yaradır.

Mütəxəssislər süngərlərin uzun müddət istifadə edilməməsini, mütəmadi dəyişdirilməsini və istifadədən sonra mümkün qədər quru saxlanılmasını tövsiyə edirlər.

Zədələnmiş yapışmayan tava

Teflon və digər yapışmayan örtüklü tavalar düzgün istifadə edilmədikdə problem yarada bilər. Örtük ciddi şəkildə cızılıb və ya qopmağa başlayıbsa, həmin qabın dəyişdirilməsi daha məqsədəuyğundur.

Köhnəlmiş plastik kəsmə taxtası

Plastik kəsmə taxtasının səthində bıçaq izləri və dərin cızıqlar yarandıqca onun təmizlənməsi çətinləşə bilər. Bu çatlarda qida qalıqları və mikroorqanizmlər qala bilər.

Bundan əlavə, kəsmə zamanı plastikdən xırda hissəciklərin ayrılması ilə bağlı araşdırmalar da mövcuddur. Buna görə səthi ciddi şəkildə cızılmış və köhnəlmiş plastik taxtaların dəyişdirilməsi tövsiyə olunur.

Mətbəxdə gigiyena yalnız qab-qacaq seçimi ilə məhdudlaşmır. Süngərlərin vaxtında dəyişdirilməsi, kəsmə taxtalarının təmiz saxlanılması və zədələnmiş qabların istifadədən çıxarılması gündəlik qida təhlükəsizliyi baxımından vacibdir.